प्रधानमन्त्री ओलीले प्रधानमन्त्री पदबाट ढिलानगरी तुरुन्त राजीनामा दिनुपर्ने बामदेव गौतम

नेपाल कम्युनिस्ट पार्टी (नेकपा) का उपाध्यक्ष बामदेव गौतमले अध्यक्षद्वय केपी शर्मा ओली र पुष्पकमल दाहाल ‘प्रचण्ड’लाई पार्टी सचिवालयको बैठक बोलाउन माग गरेका छन्। बुधबार एक प्रेस विज्ञप्तिमार्फत उपाध्यक्ष गौतमले संसद विघटन बदर भएपछिको परिस्थितिबारे छलफल गर्न सचिवालय बैठक बोलाउन माग गरेका हुन्।

‘नेपाल कम्युनिस्ट पार्टी (नेकपा) को उपाध्यक्षको हैसियतले म दुवै अध्यक्ष केपी शर्मा ओली र प्रचण्डसँग तुरुन्तै सचिवालय बैठक धुम्वाराहीस्थित पार्टीको केन्द्रीय कार्यालयमा बोलाउन अनुरोध गर्छु,’ गौतमले जारी गरेको विज्ञप्तिमा भनिएको छ।

प्रधानमन्त्री ओलीले प्रधानमन्त्री पदबाट ढिलानगरी तुरुन्त राजीनामा दिनुपर्ने पनि उनको माग छ।

यस्तै, गौतमले संवैधानिक इजलासको निर्णयलाई स्वागत गर्दै राष्ट्रपति विद्यादेवी भण्डारीले प्रतिनिधिसभा अधिवेशन आह्वान गर्नुपर्ने माग समेत अघि सारेका छन्।

संसद विघटनलाई बदर गरेरे सर्वोच्च अदालतले ऐतिहासिक फैसला गरेको उनको भनाई छ। संसद विघटन बदर भएको दिनलाई उनले निरंकुशता, स्वेच्छाचारीता, अराजकता र दुराचारीताको पराजय तथा संविधान, कानुन, लोकतन्त्र र जनताको सर्वभौमिकताले पुनर्विजय प्राप्त गरेको ऐतिहासिक दिनको रुपमा लिएको बताएका छन्।

गत पुस ५ गते प्रधानमन्त्री ओली नेतृत्वको सरकारले गरेको संसद विघटनको निर्णलयलाई सर्वोच्च मंगलबार बदर गरिदिएको थियो।

प्रतिक्रिया दिनुहोस